Тілашар
А
Ақбет тауда қар жатыр,
Ақшұнақ қыс келді ақыр.
Ә
Қызылтауды әулиелер түнеген,
Махрұм деп кім айтады киеден.
Б
Бала жастан Бердібектің Қожасын
Оқып өстім, сүйіп өстім өз басым.
Г
Гүл көмкерген дала мына
Іліксе ғой суретші қаламына.
Ғ
Ғалам байтақ Азиадаға тамсанып,
Он сан тілде жатты әлемге жар салып.
Д
Дала бізге атамекен ежелгі
Бізге қымбат асқар шыңы, өзені.
Е
Екібастұз кеншілердің қаласы
Қара алтынға бай ғой қазақ баласы.
Ж
Жезқазғанды Қаныш ашқан
Таусылмайтын бұл бір дастан.
З
Зымыранды ұшқан көкке
Күтемін мен жер жергөкте.
И
Итмұрынға шөгірі бар
Дәрумен деп әжем құмар.
К
Көлге қыста өрнек төккен
Көктем келіп мұзды сөккен.
Қ
Қарағанды
Көмірімен бұл қала дараланды.
М
Мұзайдында балалар жүр,
Коньки теуіп, жүгіріп зыр.
Л
Лай суға түсуге де, ішуге де болмайды,
Ондай сумен тентек бала ойнайды.
Н
Нағыз батыр Бауыржанды
Бауыржан деп айта алам.
Отан үшін отқа түсіп,
Қалың жауды жайпаған.
О
Отырарда көне тарих сілемі
Байтақ әлем бұл тарихты біледі.
Ө
Өтемістің Махамбеті ер еді,
Ер болмаса соңынан кім ереді.
Р
Рақымы күшті Алланың
Ақ жолында болу дәйім арманым.
С
Сәукеленің үкісіндей үлбіреп,
Ән салады сахнада бұл Жібек.
Т
Тауға шықсаң, сен бір табан
Жақындайсың көкке таман.
Ұ
Ұлыларды ғұмыр кешкен жанында
Танып- білу бақыт дер ем барында.
Х
Халық деген сенімен мен өзгелер
Бұл ұғымды дей алмаймын өзгелер.
Ш
Шара апайдың билері мен
Уақыт тапсам үйренер ем.
...
Әріп толы әліппені
Ақтардым да әріптердің
Біразына жыр арнадым,
Саған соны алып келдім.
Әр әріптің, әрбір сөздің
Орны бар біл, ардағым.